لو عندك مشروع وكل اللي ناقصك إنك تختار إسم لمشروعك يبقا البوست ده ليك 
كتير مننا بيعتقد أن إسم المشروع ده شئ ثانوي ومش مؤثر وإن أهم حاجه لازم يركز عليها هو المنتج اللي بيقدمه بس بعد فتره يا إما بيرجع يغير إسم المشروع أو بيعدله كليا وده مش بيكون سهل خاصة لو المنتج نزل السوق وللأسف بيواجه مشاكل كتير في دة عشان مهتمش بالخطوه دي من الاول 
هنساعدك ونخليك تركز علي نقط معينه تخليك تختار إسم لمشروعك بشكل احترافي يقدر يجذب العميل ويعرفه طبيعة المنتج بتاعك.
حدد العملاء المستهدفين :
إنت اكتر واحد بتكون عارف منتجك موجهه لمين فمثلاً لو كان موجهه لعملاء شعبيين يبقي لازم تختار اسم سهل النطق ميكونش إنجليزي ولو موجهه للاطفال فاكيد لازم يكون قصير وسهل التذكر.
إسم سهل النطق والكتابة :
سهوله نطق الإسم هيخليه ياخد وقت أقل في إنه يتعلق بذاكرة العميل وبالتالي لما يحتاج يرجعلك هياخد وقت أقل.
إسم غير مكرر:
الإسم لازم يكون مميز وخاص بيك أنت عشان سواء التراخيص اللي بتمنع التطابق أو إمكانية نشر مشروعك بالطابع الخاص بتاعك أنت.
اسم يعبر عن النشاط:
لازم تلبي الحاجة عند العميل يعني تشوف مشروعك بيلبي ايه وتحاول تقرب من الإسم ده زي “اطلب” – “وصلني”
اسم غير تقليدي :
لازم تبعد عن الأسماء اللي الناس اتعودت تشوفها، الاسماء التقليديه عمرها ما هترتبط بالمنتج بتاعك غير ان العملاء هيعرفوا ان طبيعه شغلك مستهلكة.
تجنب الاختصارات في بدايه طريقك:
لازم تعرف إنك عشان تستخدم اختصارت لازم يكون مشروعك خلاص بقي كبير وشاف طريق النور لأن إستخدام اختصارت في البدايه هيخليك تشرح للناس كل مره عن مفهوم الاختصارات دي اللي هتكون مبهمه للعملاء في البداية وده هياخد منك وقت ومجهود.
تجنب اسمك الشخصي:
إنك تربط مشروعك بإسمك الخاص دة هيقلل انتشار المشروع بين العامة وخاصة لو بيعت المشروع في المستقبل هيكون مرتبط بإسمك وده هيصعب علي أي حد أنه يشتري مشروع بإسم حد تاني.
ابعد عن الطبيعه الجغرافية:
إنك تربط إسم مشروعك بالطبيعة الجغرافية هيقيد من انتشاره وتوسعك خارج المنطقة دي حتي لو كانت كبيره نسبياً.
التجانس:
يعني لو اختارت إسم من مقطعين لازم يكونوا بيكملوا بعض. 
يلا بقي قولنا في الكومنتات بتعمل ايه من النصايح دي وانت بتختار اسم لمشروعك.
ولو عندك استفسار عن أي حاجة اكتبلنا في الكومنتات واحنا هنساعدك.